Álver eða ekki álver

Hérna er smá grein sem ég skrifaði og birtist í Fjarðarpóstinum í dag.

Álver eða ekki álver 

Hér á eftir eru nokkrar af þeim ástæðum  sem orsaka það að ég vil ekki stækkun álversins.  Ef þú lesandi góður segir nei við einhverjum af þessum spurningum þá ættir þú líka að segja nei við stækkun álversins þann 31.  mars nk.

 

 Álver í miðri íbúðarbyggð

Nú þegar íbúðarbyggð í Vallarhverfi er orðið að raunveruleika og svo þegar fyrirhuguð íbúðarbyggð sunnan við álverið verður að raunveruleika þá verður það staðreynd að álverið verði staðsett í miðri íbúðarbyggð.  Þannig verður Álverið orðið mitt á milli hverfa hjá okkur.  Kennileiti fyrir aðrar borgir og bæi eru til dæmis Perlan og Hallgrímskirkja fyrir Reykjavík,  Big Ben fyrir London, litla hafmeyjan fyrir Kaupmannahöfn, skakki turninn í Písa, Holmenkollen í Osló og svona mætti lengi telja.  Fyrir okkur, íbúa í Hafnarfirði, væri þekktasta kennileitið álverið.  Viljið þið hafa álver í miðri íbúðarbyggð og sem okkar þekktasta kennileiti.  Ég segi NEI

 

 Stærsti álbræðslubær í Evrópu

Eftir stækkun þá verður álverið með framleiðslugetu upp á  460.000 tonn sem verður það stærsta í Evrópu og það stærsta í heimi hjá Alcan.   Núna er oft talað um álverið í Straumsvík sem er vissulega réttnefni því það er jú staðsett í Straumsvík.  Mér finnst hins vegar réttara að tala um Álverið í Hafnarfirði þar sem að manni finnst jú Straumsvík vera lengra í burtu heldur en Hafnarfjörður.  Álverið er vissulega staðsett í Hafnarfirði.  Viljið þið vera búsett í bæ sem er þekktur fyrir að vera stærsti álbræðslubær Evrópu?   Ekki ég og því segi ég NEI við stækkun álversins.

 

 Nágrenni íbúðarbyggðar

Frá núverandi íbúðabyggð þá er álverið í um 1.500 metra frá íbúðabyggð á Hvaleyrarholti (1.900 metra frá Hvaleyrarskóla) og 1.700 metra frá íbúðabyggð á völlunum.  Álverið verður enn nær Völlunum eftir stækkun.  Til samanburðar þá eru um 1.800 metrar frá Hvaleyrarskóla niður í Fjörð, verslunarmiðstöð í miðbæ Hafnarfjarðar, og 2.100 metrar frá íbúðarbyggð á Völlunum niður í miðbæ.  Hafið í huga að einmitt vegna nálægðar við íbúðarbyggð var Áburðarverksmiðjunni í Reykjavík lokað

Ég spyr því:  Eruð þið hlynnt því að stóriðja sé í aðeins 1,5 km fjarlægð frá næsta íbúðarhúsi?  Ég segi NEI.

 

 Línumannvirki

Nú komum við að máli sem kemur kannski Hafnfirðingum minna við og landsmönnum öllum meira.  Við stækkun á álverinu þarf líka að gera ráðstafanir til að koma öllu því rafmagni sem álverið þarfnast til þeirra.  Við þær framkvæmdir þarf að búa til stærstu línumannvirki Íslandssögunnar í gegnum átta sveitarfélög á Suðvestur og Suðurlandi.  Þeir sem hafa séð álverið í Reyðarfirði og þær verulegu sjónmengun og skemmdir sem línuframkvæmdirnar hafa haft á Skriðdal og nágrenni á Austurlandi hljóta að segja NEI við þessum framkvæmdum hér.

 

 Mengun

Forsvarsmenn Álversins hafa verið duglegir að sýna fram á að mengun aukist ekki eða réttara sagt aukist minna heldur en stækkunin er.  Einnig hafa þeir verið að benda á að skv.  mælingum á Hvaleyrarholti þá sé svifryksmengun þar ekki komin frá álverinu.  Mikið hefur verið rætt um svifryksmengun í vetur og hefur hún aukist það mikið á höfuðborgarsvæðinu að hún fór nokkrum sinnum yfir hættumörk.  Það hlýtur því að vera að með því að þrefalda álverið þá aukist mengunin.  Eigum við ekki að vera að vinna í því að minnka mengun í þéttbýli með öllum mögulegum ráðum?  Viljum við ekki geta haldið áfram að leyfa ungabörnum okkar að sofa úti á svölum?  Við getum barist gegn mengun með ýmsum hætti en einnig með því að segja NEI við stækkum Álversins.

 

Ég vil að lokum taka það fram að ég hef ekkert á móti því ágæta fólki sem starfar eða hefur starfað í Álverinu.  Ég hef heldur enga trú á því að fyrirtæki sem er rekið með góðum hagnaði og er eitt af þeim stærri hjá Alcan verði lokað.

 

Hafnfirðingar, segjum NEI við stækkun álversins og verum stolt af því að segja við börnin okkar og barnabörnin að við höfum séð til þess að bærinn þeirra sé nú betri bær fyrir vikið.

 

Höfundur er íbúi í Hafnarfirði

 

Athugasemdir

[Björn Emil Traustason, 22.3.2007 kl. 23:27]

Hafnfirðingar, segjum JÁ við stækkun álversins og verum stolt af því að segja við börnin okkar og barnabörnin að við höfum séð til þess að bærinn þeirra sé nú betri bær fyrir vikið.